ساعات قليلة و بتخلص سنة ال2011 بكل الذكريات اللي عشناها … الحلوة منها و المرة .
هلق اكيد هديك السنة متل هالوقت كان كل واحد مننا عندو تمنيات للسنة الجديدة متل ما رح يصير هالسنة و كل سنة , بس بصراحة ما ممكن أصدقك كمية الأمور اللي قدرت أحققها بال2011 …. هالسنة يمكن من السنين اللي صعب أنو انساها , فيها حققت نجاحات و قفزات كبيرة ما كنت حاسبها ابدا سواء عالصعيد الشخصي أو على صعيد العمل أو حتى على صعيد حياتي الخاصة .
تعلمت هالسنة أنو الحياة فعلاّ صعبة و خاصة لما بتجبرك الحياة أنو تودع أشخاص تركو أثر كبير بحياتك و أنت بتعرف أنو في إحتمال كتير كبير أنو ما ترجع تلتقي فيون مرة تانية و يمكن تبقى وسيلة الإتصال الوحيد هي الشبكة العنكبوتية من فيسبوك و مسنجر و سكاي ! بس من ناحية تانية و كأنو الحياة ما بدا يانا نعاني بشكل كبير بعتلتلي ناس جدد لأتعرف عليون و أكون صداقات جديدة و أعيش خبرات جديدة كلياّ و أنا عم بحاول ما أفكر شو رح يصير باليوم اللي رح تضطرنا الحياة أنو نرجع نفترق من جديد .
ما رح اتسرع و اوقول أنو سنة ال2011 أحلى سنة بحياتي لأنو هيك بكون عم بقتل فرصة السنين الجاية أنو تثبت حالها بس رح أأكدلها أنو رح تكون وحدة من السنين المميزة و اللي ما رح انساها بسهولة .
بالنهاية بحب أتشكر كل شخص مرق بحياتي و ترك أثرو سلبي كان أم ايجابي … ما ح اذكر اسامي لأنون كتير كتار و بخاف أظلم حدا و ما اذكرو بس أكيد بالرغم من كل هالشي بتمنى أنو سنة ال2012 تقدر تحقق أماني كل واحد من بيناتنا و تخليه مبسوط و رضيان عن حياتو و بتمنى أنو تحمل السلام لوطني سوريا و ترجعلو الأمان اللي كنا منفتخر فيو قدام العالم كلها , و دمتم سالمين .
